KategoriPwezi

M’HOUUU ! / (REKÈY: Soti Yè Rive Nan Pwezi / OTÈ: Francklin Pierre)

forcover3writeJou solèy pa leve,

Jou nan nwit

Pa janm retornen.

Kouman n’ap ye?

 

Jou zetwal yo

Dekole, sot tonbe,

Jou pye bwa

pa leve,

kouman n’ap fè ?

 

jou fomi fou

vin tèt dwat,

jou jako

sispann pale,

sa n’ap di ?

 

Jou poul vin gen dan,

Zandolit tonbe manje kann,

Jou rat pa pè chat ankò

Kote’n prale ?

 

Bondye fè

Bondye se yon pye pitye

Si se pa’t sa… M’houuuu…

 

REKÈY: Soti Yè Rive Nan Pwezi / OTÈ: Francklin Pierre

LA LIN BARE ZETWAL (PWEZI KREYOL/ FRANCKLIN PIERRE)

coverexempdoneAba lapli nan peyi

Ki jouke sou pil wòch,

Nan savann kote fèy bwa

Mare goumen ak pousyè.

Anba kabann moun fou,

Ki pran lari gwo jounen.

Kay kòmè yaya

Kote ti moun

Pa vle ale fè komisyon.

 

Nan kanal kote dlo pa janm pase.

Nan touf pikan kwenna

Kote mabouya ap tire kont ak ti bwa.

Lalin kenbe zetwal

K’ap bouyi zen

Avèk ti limyè klou gagit.

Lalin bare zetwal tande!

Bann renmen zen, nou tande ?

JOU POU JOU (Pwezi ekstrè)

forcover3writeYè maten

Se te bon zanmi solèy,

Yo koupe fache

Pou yon zafè lonbraj.

 

Konpè solèy se blagè,

Li ale kache dèyè tèt mòn.

Li chita sou ti chèz li,

L’ap kale pwa avèk sizè di maten.

Ya’p tann demen.

 

(Yon ekstrè nan powèm Jou pou Jou / Otè: Franklin Pierre /  Rekèy: Soti yè rive nan pwezi )